Vlerat tona

Është një Perëndi ¹ që është pafundësisht i përsosur, ² i cili ekziston përjetësisht në tri persona: Ati, Biri dhe Fryma e Shenjtë. ³

Jezu Krishti është Perëndia i vërtetë dhe njeriu i vërtetë. ⁴ Ai u ngjiz nga Fryma e Shenjtë dhe lindi nga virgjëresha Mari. ⁵ Jezusi vdiq në kryq, I Drejti për të padrejtët, ⁶ si sakrifica zëvendësuese; ⁷ dhe të gjithë ata që besojnë në Të janë drejtësuar për shkak të gjakut që Ai derdhi. ⁸ Jezusi u ngrit prej së vdekurish sipas Shkrimit.9 Ai është tani në të djathtën e Madhërisë së Lartë si Kryeprifti ynë. ¹⁰ Jezusi do të kthehet sërish për të vendosur mbretërinë, drejtësinë dhe paqen e Tij. ¹¹

Fryma e Shenjtë është një person hyjnor, ¹² dërguar për të banuar, për të drejtuar, për të mësuar dhe për të fuqizuar besimtarët, ¹³ gjithashtu për të bindur botën për mëkat, për drejtësi dhe gjykim. ¹⁴

Dhiata e Vjetër dhe e Re, siç u dhanë të pagabueshme, ishin të frymëzuara verbalisht nga Perëndia dhe janë zbulesa e plotë e vullnetit të Tij për shpëtimin e njerëzve. Ato përmbajnë rregullën e vetme hyjnore të besimit dhe të jetës së krishterë. ¹⁵

Njeriu u krijua sipas shëmbëlltyrës së Perëndinë dhe në ngjashmëri me Të: ¹⁶ ai ra përmes mosbindjes, duke iu nënshtruar kështu vdekjes fizike dhe asaj shpirtërore. Të gjithë ata që lindin me një natyrë mëkatare, ¹⁷ janë të ndarë nga jeta me Perëndinë dhe mund të shpëtohen vetëm përmes veprës shlyese të Zotit Jezu Krisht. ¹⁸ Pjesa e atyre që nuk besojnë e nuk pendohen, jeton përjetësisht në mundim të vetëdijshëm; ¹⁹ ndërsa pjesa e atyre që besojnë, jeton në gëzim dhe lumturi të përjetshme. ²⁰

Shpëtimi është siguruar përmes Jezu Krishtit për të gjithë njerëzit; dhe ata që pendohen e besojnë në Të, rilindin nga Fryma e Shenjtë, marrin dhuratën e jetës së përjetshme dhe bëhen fëmijë të Perëndisë. ²¹

Vullneti i Perëndisë është që çdo besimtar të mbushet me Frymën e Shenjtë dhe të shenjtërohet tërësisht, ²² duke u ndarë nga mëkati dhe nga bota, e duke u përkushtuar plotësisht ndaj vullnetit të Perëndisë, duke marrë kështu fuqinë e jetesës së shenjtë dhe shërbimit efektiv. ²³ Ky përjetim pas kthimit në besim është edhe krizë, por edhe përparim në jetën e besimtarit. ²⁴

Vepra shpenguese e Zotit Jezu Krisht ka siguruar shërimin e trupit të vdekshëm. ²⁵ Lutja për të sëmurët dhe vajosja me vaj mësohen në Shkrim dhe janë privilegje të kishës në kohën ku jetojmë. ²⁶

Kisha përbëhet nga të gjithë ata që besojnë në Zotin Jezu Krisht, të cilët janë të shpenguar përmes gjakut të Tij dhe kanë rilindur nga Fryma e Shenjtë. Krishti është Kreu i Trupit, i Kishës, ²⁷ e cila është urdhëruar prej Tij të shkojë në të gjithë botën si dëshmitare për të predikuar Ungjillin në të gjitha kombet. ²⁸ Kisha vendase është trupi i besimtarëve që janë bashkuar për adhurimin e Perëndisë, për ndërtim përmes Fjalës së Perëndisë, për lutje, bashkësi, shpalljen e Ungjillit dhe për pjesëmarrjen në sakramentet e pagëzimit dhe Darkës së Zotit. ²⁹

Do të ketë ringjallje fizike të të drejtëve dhe të të padrejtëve; ³⁰ për të drejtët një ringjallje në jetë; për të padrejtët, ringjallje në gjykim. ³¹

Ardhja e dytë e Zotit Jezu Krisht është shumë e afërt32 dhe do të jetë personale, e dukshme dhe para mijëvjeçarit. ³³ Kjo është shpresa e lume e besimtarit dhe e vërteta jetësore, e cila na nxit për jetesë të shenjtë dhe shërbim besnik. ³⁴

¹ Ligji i Përtërirë 6:4, ² Mateu 5:48, ³ Mateu 28:19, ⁴ Filipianëve 2:6–11, ⁵ Luka 1:34-38, ⁶ 1 e Pjetrit 3:18, ⁷ Hebrenjve 2:9, ⁸ Romakëve 5:9, ⁹ Veprat 2:23-24, ¹⁰ Hebrenjve 8:1, ¹¹ Mateu 26:64, ¹² Gjoni 14:15-18, ¹³ Gjoni 16:13; Veprat 1:8, ¹⁴ Gjoni 16:7-11, ¹⁵ 2 e Pjetrit 1:20-21; 2 e Timoteut 3:15-16, ¹⁶ Zanafilla 1:27, ¹⁷ Romakëve 3:23, ¹⁸ 1 e Korintasve 15:20-23, ¹⁹ Zbulesa 21:8, ²⁰ Zbulesa 21:1-4, ²¹ Titit 3:4-7, ²² 1 e Thesalonikasve 5:23, ²³ Veprat 1:8, ²⁴ Romakëve 6:1-14, ²⁵ Mateu 8:16-17, ²⁶ Jakobi 5:13-16, ²⁷ Efesianëve 1:22-23, ²⁸ Mateu 28:19-20, ²⁹ Veprat 2:41-47, ³⁰ 1 e Korintasve 15:20-23, ³¹ Gjoni 5:28-29, ³² Hebrenjve 10:37, ³³ Luka 21:27, ³⁴ Titit 2:11-14